പുതിയൊരനുഭവം

ഞാൻ കിളിയോട് പറഞ്ഞു,
"എനിക്ക് നിന്നെപ്പറ്റി
ഒരു കവിതയെഴുതണമെന്നുണ്ട്.."
കിളി ചോദിച്ചു,
"നിന്റെ വാക്കുകളിൽ
എന്റെ തൂവലുകളുടെ നിറക്കൂട്ടുകളുണ്ടോ..?"

ഞാൻ പറഞ്ഞു,
"ഇല്ല.."

"നിന്റെ വാക്കുകളിൽ
എന്റെ കണ്ഠത്തിന്റെ സംഗീതമുണ്ടോ..?"

"ഇല്ല.."

"നിന്റെ വാക്കുകളിൽ
എന്റെ ചിറകുകളുടെ വേഗമുണ്ടോ..? "

'ഇല്ല..'

"ജീവനുണ്ടോ..?"

"ഇല്ല.."

''പിന്നെന്തു കവിതയാ
നീയെന്നെപ്പറ്റി എഴുതാൻ പോണേ..?"

ഞാൻ പറഞ്ഞു,
"പക്ഷേ, നിന്നോടെനിക്ക് സ്നേഹമുണ്ടല്ലോ.."

കിളി പറഞ്ഞു,
"അതിന്
സ്നേഹവും വാക്കുകളും തമ്മിലെന്തു ബന്ധം..?"

അതെനിക്ക് പുതിയൊരനുഭവമായിരുന്നു..
പിന്നെ ഞാനൊരക്ഷരം മിണ്ടിയില്ല..!